മലപ്പുറം: ജില്ലയെ യാചകമുക്തമാക്കുക എന്ന ലക്ഷ്യത്തോടെ കേന്ദ്ര സാമൂഹികനീതി ശാക്തീകരണ മന്ത്രാലയത്തിന്റെ ‘സ്മൈൽ’ (SMILE - Support for Marginalised Individuals for Livelihood and Enterprise) പദ്ധതിക്ക് മലപ്പുറത്ത് തുടക്കമായി. യാചനയിൽ ഏർപ്പെട്ടിരിക്കുന്നവരെ കണ്ടെത്തി പുനരധിവസിപ്പിക്കുകയും സ്വയംതൊഴിൽ പരിശീലനത്തിലൂടെ മാന്യമായ ഉപജീവനമാർഗം ഉറപ്പാക്കുകയുമാണ് പദ്ധതിയുടെ പ്രധാന ലക്ഷ്യം.
ജില്ലാ സാമൂഹികനീതി ഓഫീസറാണ് പദ്ധതിയുടെ നോഡൽ ഓഫീസർ. പാണ്ടിക്കാട് ആസ്ഥാനമായി പ്രവർത്തിക്കുന്ന ‘സൽവാ കെയർ’ എന്ന സന്നദ്ധ സംഘടനയ്ക്കാണ് പദ്ധതിയുടെ നിർവഹണ ചുമതല. തദ്ദേശ സ്വയംഭരണ സ്ഥാപനങ്ങൾ, പോലീസ്, വിവിധ വകുപ്പുകൾ, സന്നദ്ധ സംഘടനകൾ എന്നിവരെ ഏകോപിപ്പിച്ചാണ് പദ്ധതി ജില്ലയിൽ നടപ്പാക്കുന്നത്.
പൊതുജനങ്ങൾക്കും പങ്കുചേരാം
യാചനയിൽ ഏർപ്പെടുന്നവരെ കണ്ടെത്തുന്നതിനായി പ്രത്യേക വാഹനസൗകര്യം അധികൃതർ സജ്ജീകരിച്ചിട്ടുണ്ട്. യാചകർക്ക് പണം നൽകുന്നതിന് പകരം അവരെ ജീവിതത്തിലേക്ക് തിരിച്ചുകൊണ്ടുവരാൻ സഹായിക്കുകയാണ് പദ്ധതിയുടെ യഥാർത്ഥ ലക്ഷ്യം. പൊതുസ്ഥലങ്ങളിൽ യാചകരെ കാണുന്നപക്ഷം പൊതുജനങ്ങൾക്ക് വിവരങ്ങൾ അധികൃതരെ അറിയിക്കാം. വിവരങ്ങൾ ലഭിക്കുന്നതിന്റെ അടിസ്ഥാനത്തിൽ ഉദ്യോഗസ്ഥരെത്തി ഇവരെ ഏറ്റെടുക്കും. തുടർന്ന് ഇവർക്ക് ആവശ്യമായ പരിചരണവും വിദഗ്ധ പരിശീലനവും നൽകി അന്തസ്സോടെ ജീവിക്കാൻ പ്രാപ്തരാക്കും.
യാചകരെക്കുറിച്ചുള്ള വിവരങ്ങൾ സ്ഥലം, ഫോട്ടോ എന്നിവ സഹിതം 9961177333, 9961177133 എന്നീ നമ്പറുകളിലാണ് പൊതുജനങ്ങൾ അറിയിക്കേണ്ടത്.
English Summary
The 'SMILE' (Support for Marginalized Individuals for Livelihood and Enterprise) project has been launched in Malappuram with the goal of making the district beggar-free. Initiated by the Union Ministry of Social Justice, the project aims to rehabilitate beggars by providing them with care and self-employment training. 'Salwa Care', an NGO based in Pandikkad, is implementing the project. The public can report sightings of beggars to the authorities via WhatsApp with photos and locations to the helpline numbers 9961177333 and 9961177133.