സംസ്ഥാന സർക്കാരിന്റെ നൂറുദിന കർമപരിപാടിയുടെ ഭാഗമായി ഏകാധ്യാപക വിദ്യാലയമായിരുന്ന തിരൂരങ്ങാടി ബ്ലോക്ക്‌ പഞ്ചായത്തിലെ കാളംതിരുത്തി ബദൽ സ്‌കൂളിനെ ഗവൺമെന്റ് ലോവർ പ്രൈമറി സ്‌കൂളായി ഉയർത്തിയതിന്റെ ഉദ്ഘാടനം പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ധീൻ നിർവഹിച്ചു.
പിന്നാക്ക മേഖലകളിലെ കുട്ടികൾക്ക് മികച്ച വിദ്യാഭ്യാസ സാഹചര്യം ഒരുക്കുന്നതിന്റെ ഭാഗമായി സ്‌കൂളിൽ ആവശ്യമായ അടിസ്ഥാന സൗകര്യങ്ങളും അധ്യാപക സേവനങ്ങളും ഉറപ്പാക്കുമെന്ന് മന്ത്രി ഉദ്ഘാടനപ്രസംഗത്തിൽ പറഞ്ഞു. 1997-ൽ നാട്ടുകാരുടെ നേതൃത്വത്തിൽ ആരംഭിക്കുകയും പിന്നീട് ഡി.പി.ഇ.പി - എം.ജി.എൽ.സി. ആയി ഏറ്റെടുക്കുകയും ചെയ്ത ഈ ബദൽവിദ്യാലയം ജനപ്രതിനിധികളുടെയും നാട്ടുകാരുടെയും സഹകരണത്തോടെയാണ് പ്രവർത്തിച്ചിരുന്നത്. സംസ്ഥാനത്തെ എട്ട് ഏകാധ്യാപക വിദ്യാലയങ്ങളെ ഗവ. എൽ.പി സ്‌കൂളുകളായി ഉയർത്താനുള്ള പദ്ധതിയുടെ ഭാഗമായാണ് സ്‌കൂളിന് പുതിയ പദവി അനുവദിച്ചത്. ഇതിലൂടെ പ്രദേശത്തെ കുട്ടികൾക്ക് കൂടുതൽ മെച്ചപ്പെട്ട പ്രാഥമിക വിദ്യാഭ്യാസ സൗകര്യങ്ങൾ ലഭ്യമാകും.
തിരുരങ്ങാടി എം.എൽ.എ പി.എം.എ സമീർ അധ്യക്ഷത വഹിച്ച പരിപാടിയിൽ മുൻ വിദ്യാഭ്യാസ വകുപ്പ് മന്ത്രി പി.കെ അബ്ദുറബ്ബ്, മുൻ എം.എൽ.എ കെ.പി.എ. മജീദ്, തിരൂരങ്ങാടി ബ്ലോക്ക്‌ പഞ്ചായത്ത് പ്രസിഡന്റ് ഇ.കെ ബഷീർ, ജില്ലാ പഞ്ചായത്ത് മെമ്പർ ശരീഫ് കുറ്റൂർ, നന്നമ്പ്ര ഗ്രാമപഞ്ചായത്ത് പ്രസിഡന്റ് മൊയ്‌തീൻകുട്ടി പച്ചായി, വൈസ് പ്രസിഡന്റ് സൗദ മരക്കാരുട്ടി, പരപ്പനങ്ങാടി നഗരസഭ ചെയർപേഴ്സൺ സുബൈദ, തിരുരങ്ങാടി നഗരസഭ ചെയർപേഴ്സൺ സി.പി ഹബീബ ബഷീർ, ഗ്രാമപഞ്ചായത്ത് - ബ്ലോക്ക്‌ പഞ്ചായത്ത് മെമ്പർമാർ, സ്ഥിരം സമിതി അംഗങ്ങൾ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.
English Summary
The Kalamthiruthi Alternative School (Single Teacher School) in Tirurangadi Block Panchayat has been officially upgraded to a Government Lower Primary (LP) School. General Education Minister N. Shamsudheen inaugurated the upgraded facility as part of the state government's 100-day action plan. MLA P.M.A Sameer presided over the function, which was attended by prominent political figures and local representatives.