കോക്പിറ്റിലെ ആക്രമണം ചെറുത്തു; ഫ്ലൈ ദുബായ് ജീവനക്കാർക്ക് യു.എ.ഇ പ്രസിഡന്റിന്റെ പരമോന്നത ആദരവ്

അബുദാബി: സെപ്റ്റംബർ 30ന് ദുബായിൽ നിന്ന് തെൽഅവീവിലേക്ക് പറന്ന ഫ്ലൈ ദുബായ് വിമാനത്തിൽ കോ-പൈലറ്റ് നടത്തിയ തട്ടിയെടുക്കൽ ശ്രമം ധീരമായി ചെറുത്ത് യാത്രക്കാരുടെ ജീവൻ രക്ഷിച്ച ജീവനക്കാരെ യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽനഹ്‌യാൻ ആദരിച്ചു. ജീവനക്കാർക്ക് യു.എ.ഇയുടെ ഉയർന്ന ബഹുമതിയായ ‘ഫസ്റ്റ് ക്ലാസ് ഓർഡർ ഓഫ് സായിദ്’ സമ്മാനിച്ചു.

യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽമക്തൂമിന്റെ സാന്നിധ്യത്തിൽ, ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽമക്തൂമാണ് ജീവനക്കാർക്ക് ബഹുമതികൾ കൈമാറിയത്.

ജീവൻ പണയം വെച്ചുള്ള പോരാട്ടം

സെപ്റ്റംബർ 30ന് 174 യാത്രക്കാരും 8 ജീവനക്കാരുമായി പുറപ്പെട്ട എഫ്.ഇസെഡ് 1073 ഫ്ലൈ ദുബായ് വിമാനത്തിലാണ് നാടകീയ സംഭവങ്ങൾ അരങ്ങേറിയത്. യാത്രയ്ക്കിടെ വിമാനം തട്ടിയെടുത്ത് ഇസ്രായേലിൽ ചാവേറാക്രമണം നടത്താനായിരുന്നു കോ-പൈലറ്റിന്റെ പദ്ധതി. ഇതിനായി കോ-പൈലറ്റ് വിമാനത്തിന്റെ പ്രധാന പൈലറ്റായ ഇന്ത്യൻ സ്വദേശി ക്യാപ്റ്റൻ സ്മിത്ത് മച്ചാറിനെ ആക്രമിച്ച് ഗുരുതരമായി പരിക്കേൽപ്പിച്ചു.

എന്നാൽ, ഗുരുതര പരിക്കുകൾ അവഗണിച്ചും ധീരമായി ചെറുത്തുനിന്ന ക്യാപ്റ്റൻ സ്മിത്ത് മച്ചാർ കോക്പിറ്റിന്റെ വാതിൽ തുറന്ന് മറ്റു ജീവനക്കാരുടെയും യാത്രക്കാരുടെയും സഹായം തേടുകയായിരുന്നു. തുടർന്ന് എല്ലാവരും ചേർന്ന് കോ-പൈലറ്റിനെ കീഴടക്കുകയും വിമാനത്തിന്റെ നിയന്ത്രണം തിരികെ പിടിക്കുകയും ചെയ്തു. അടിയന്തര സാഹചര്യത്തെ തുടർന്ന് വിമാനം സൗദി അറേബ്യയിലെ തബൂക്കിലേക്ക് സുരക്ഷിതമായി വഴിതിരിച്ചുവിട്ടു.

സർക്കാരിന്റെ അഭിനന്ദനം

ജീവനക്കാരുടെ സമയബന്ധിതമായ ഇടപെടലിനെയും പ്രൊഫഷണലിസത്തെയും ധീരതയെയും യു.എ.ഇ ഭരണാധികാരികൾ പ്രശംസിച്ചു. ജനങ്ങളുടെ സുരക്ഷയ്ക്കും സംരക്ഷണത്തിനുമാണ് യു.എ.ഇ എപ്പോഴും പരമോന്നത പരിഗണന നൽകുന്നതെന്ന് ചടങ്ങിൽ സംസാരിച്ചവർ വ്യക്തമാക്കി. തങ്ങൾക്ക് ലഭിച്ച ഈ വലിയ അംഗീകാരത്തിന് ജീവനക്കാർ യു.എ.ഇ പ്രസിഡന്റിനോട് നന്ദി അറിയിച്ചു. സേവനം, സമർപ്പണം, പ്രതിബദ്ധത എന്നീ മൂല്യങ്ങൾക്കുള്ള അംഗീകാരമായാണ് ഈ പുരസ്കാരത്തെ കാണുന്നതെന്ന് അവർ പറഞ്ഞു.

ദുബായ് സിവിൽ ഏവിയേഷൻ അതോറിറ്റി പ്രസിഡന്റും എമിറേറ്റ്സ് ഗ്രൂപ്പ് ചെയർമാനുമായ ശൈഖ് അഹ്‌മദ് ബിൻ സഈദ് അൽമക്തൂം ഉൾപ്പെടെയുള്ള ഉന്നത ഉദ്യോഗസ്ഥരും ചടങ്ങിൽ പങ്കെടുത്തു.

English Summary

UAE President Sheikh Mohamed bin Zayed Al Nahyan honoured the crew of flydubai flight FZ 1073 with the 'First Class Order of Zayed' for their heroic actions in thwarting a hijack attempt by the co-pilot on September 30. The main pilot, Indian national Captain Smith Macchar, despite being severely injured, fought back and managed to subdue the attacker with the help of the crew and passengers, safely diverting the Tel Aviv-bound flight to Tabuk in Saudi Arabia.