ദേശീയപാതയിലെ ഗതാഗതക്കുരുക്കിന് പരിഹാരം കാണും; ക്യാമറ നിരീക്ഷണം ശക്തമാക്കാൻ റോഡ് സുരക്ഷാ കൗൺസിൽ തീരുമാനം

മലപ്പുറം: ദേശീയപാതയിലെ ഗതാഗതക്കുരുക്കുകൾ പരിഹരിക്കുന്നതിനും റോഡ് സുരക്ഷ ഉറപ്പാക്കുന്നതിനും ലക്ഷ്യമിട്ട് ജില്ലാ കളക്ടറുടെ ചേംബറിൽ റോഡ് സുരക്ഷാ കൗൺസിൽ യോഗം ചേർന്നു. ജില്ലാ കളക്ടർ ഡോ. വിനയ് ഗോയൽ അധ്യക്ഷത വഹിച്ച യോഗത്തിൽ ദേശീയപാതയിലെ വിവിധ പ്രശ്നങ്ങൾ വിശദമായി വിലയിരുത്തുകയും മുൻ തീരുമാനങ്ങളുടെ പുരോഗതി പരിശോധിക്കുകയും ചെയ്തു.

പാർക്കിങ് സൗകര്യം ഒരുക്കും

ദേശീയപാതയുടെ ഇരുവശങ്ങളിലും വാഹനങ്ങൾക്ക് സുരക്ഷിതമായ പാർക്കിങ് സൗകര്യം ഒരുക്കുന്നതിന് കണ്ടെത്തിയ സ്ഥലങ്ങളിലെ പ്രവൃത്തികൾ വേഗത്തിൽ പൂർത്തിയാക്കാൻ ദേശീയപാത അതോറിറ്റിക്ക് നിർദേശം നൽകി. വെട്ടിച്ചിറ ടോൾ പ്ലാസയ്ക്ക് സമീപവും ആവശ്യമായ പാർക്കിങ് സൗകര്യം ഒരുക്കും. ബസ് സർവീസുകളുമായി ബന്ധപ്പെട്ട പരാതികൾ, സർവീസ് റോഡുകളിലെ അപാകതകൾ, യാത്രക്കാരുടെ പ്രശ്നങ്ങൾ എന്നിവ ചൂണ്ടിക്കാട്ടി മോട്ടോർ വാഹന വകുപ്പ് തയ്യാറാക്കിയ പഠന റിപ്പോർട്ട് തുടർനടപടികൾക്കായി സർക്കാരിലേക്ക് സമർപ്പിക്കാനും തീരുമാനമായി.

എ.ഐ ക്യാമറ നിരീക്ഷണം

റോഡപകടങ്ങൾ തടയുന്നതിനായി നിലവിലുള്ള ക്യാമറ നിരീക്ഷണ സംവിധാനം കൂടുതൽ ശക്തമാക്കും. കൂടാതെ, കൃത്രിമബുദ്ധി (AI) അധിഷ്ഠിത ഡിജിറ്റൽ പരിശോധനാ സംവിധാനം നടപ്പാക്കുന്നതിനുള്ള റിപ്പോർട്ടും സർക്കാരിന് കൈമാറും. യോഗത്തിൽ പ്രധാനപ്പെട്ട 14 നിർദ്ദേശങ്ങൾക്ക് അംഗീകാരം നൽകി.

ജില്ലാ റോഡ് സുരക്ഷാ സമിതി കൺവീനറും ആർ.ടി.ഒ എൻഫോഴ്സ്മെന്റുമായ സലിം വിജയകുമാർ, ജില്ലാ പോലീസ് സൂപ്രണ്ട് ചൈത്ര തെരേസ ജോൺ, ദേശീയപാത അതോറിറ്റി പ്രതിനിധികൾ, വിവിധ വകുപ്പ് ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.

English Summary

To resolve traffic congestion and ensure road safety on the National Highway, a Road Safety Council meeting was held in Malappuram, chaired by District Collector Dr. Vinay Goyal. The meeting directed the NHAI to expedite the construction of safe parking facilities, including near the Vettichira toll plaza. It was also decided to strengthen AI camera surveillance on the highways to prevent accidents, and 14 key safety proposals were approved during the session.