കളഞ്ഞു കിട്ടിയ മൊബൈല്‍ സ്റ്റേഷനില്‍ ഏല്‍പ്പിച്ചു; പോലീസുകാരന്‍ എടുത്ത് വിറ്റു; മോഷണത്തിന് കേസ്!

കാസർകോട്: ജനങ്ങൾക്ക് സുരക്ഷയൊരുക്കേണ്ട പോലീസ് സ്റ്റേഷൻ തന്നെ കവർച്ചാ കേന്ദ്രമായി മാറിയ ഞെട്ടിക്കുന്ന സംഭവത്തിൽ സേനയ്ക്ക് നാണക്കേട്. കാസർകോഡ് ജില്ലയിലെ ചന്തേര പോലീസ് സ്റ്റേഷനിൽ പൊതുജനങ്ങൾ കളഞ്ഞുകിട്ടി ഏൽപ്പിച്ച മൊബൈൽ ഫോൺ അടിച്ചുമാറ്റി രഹസ്യമായി വിൽപ്പന നടത്തിയ സീനിയർ സിവിൽ പോലീസ് ഓഫീസർക്കെതിരെയാണ് കേസെടുത്തിരിക്കുന്നത്. നീർച്ചാൽ സ്വദേശിയായ വൈ. ബൈജുവിനെതിരെയാണ് (41) ജില്ലാ പോലീസ് മേധാവിയുടെ നിർദ്ദേശപ്രകാരം മോഷണക്കുറ്റത്തിന് കേസെടുത്തിട്ടുള്ളത്.

എസ്.ഐ വിഷ്ണു‌ എസ്. നായർ തയ്യാറാക്കി സമർപ്പിച്ച വിശദമായ അന്വേഷണ റിപ്പോർട്ടിന്റെ അടിസ്ഥാനത്തിൽ ജില്ലാ പോലീസ് ചീഫ് നിധിൻ രാജിന്റെ ഉത്തരവുപ്രകാരമാണ് നടപടി.

സ്റ്റേഷനിൽ ഏൽപ്പിച്ച ഫോൺ അപ്രത്യക്ഷമായി

ഈ മാസം 8-നാണ് കേസിനാസ്‌പദമായ സംഭവം നടക്കുന്നത്. അന്ന് ചന്തേര സ്റ്റേഷനിൽ പാറാവ് ഡ്യൂട്ടിയിലുണ്ടായിരുന്ന സീനിയർ സിവിൽ പോലീസ് ഓഫീസർ ബൈജുവായിരുന്നു. സ്റ്റേഷന് സമീപത്ത് താമസിക്കുന്ന അന്യസംസ്ഥാന തൊഴിലാളിക്ക് 10,000 രൂപ വിലവരുന്ന റെഡ‌ിയുടെ മൊബൈൽ ഫോൺ വഴിയിൽ നിന്ന് കളഞ്ഞുകിട്ടിയിരുന്നു. അദ്ദേഹം ഇത് സ്റ്റേഷനിൽ കൊണ്ടുവന്ന് ഏൽപ്പിക്കുകയും, ഉടമയെ കണ്ടെത്താനായി പാറാവ് ബുക്കിൽ ഔദ്യോഗികമായി രേഖപ്പെടുത്തുകയും ചെയ്തിരുന്നു. രാമന്തളി സ്വദേശിനിയായ വീട്ടമ്മയുടെതായിരുന്നു ഈ ഫോൺ.

അടുത്ത ദിവസം തന്നെ ഫോൺ കൈപ്പറ്റാൻ എത്താമെന്ന് വീട്ടമ്മ പൊലീസിനെ അറിയിച്ചിരുന്നുവെങ്കിലും ചില കാരണങ്ങളാൽ ഒരാഴ്‌ച കഴിഞ്ഞാണ് മകൻ ഫോൺ വാങ്ങാനായി സ്റ്റേഷനിൽ എത്തിയത്. എന്നാൽ സ്റ്റേഷനിലെ മേശവലിപ്പിൽ ഭദ്രമായി സൂക്ഷിച്ചിരുന്ന ഫോൺ പരിശോധിച്ചപ്പോഴാണ് അത് കാണാനില്ലെന്ന വിവരം ഉദ്യോഗസ്ഥർ അറിയുന്നത്.

വാട്സാപ്പ് ഗ്രൂപ്പിലെ സന്ദേശവും സൈബർ അന്വേഷണവും

ഫോൺ കാണാതായതോടെ പരിഭ്രാന്തരായ ഉദ്യോഗസ്ഥർ സ്റ്റേഷനിലെ പൊലീസുകാരുടെ വാട്സാപ് ഗ്രൂപ്പിൽ സന്ദേശമയച്ചു. 'ഫോൺ ആരെങ്കിലും അബദ്ധത്തിൽ മാറ്റിവെച്ചിട്ടുണ്ടെങ്കിൽ അത് തിരികെ നൽകണം' എന്നായിരുന്നു സന്ദേശം. തുടർന്നാണ് എസ്.ഐ അടക്കമുള്ള ഉയർന്ന ഉദ്യോഗസ്ഥർ വിവരമറിയുന്നത്. സൈബർ സെല്ലിന്റെ സഹായത്തോടെ നടത്തിയ സാങ്കേതിക അന്വേഷണത്തിലാണ് നിർണ്ണായക വിവരങ്ങൾ പുറത്തുവന്നത്. ബദിയടുക്കയിലുള്ള ഒരാൾ ഈ മൊബൈൽ ഫോൺ ഉപയോഗിക്കുന്നതായി കണ്ടെത്തിയ പോലീസ്, അയാളെ വിളിച്ചുവരുത്തി ചോദ്യം ചെയ്തപ്പോഴാണ് ഒരു പൊലീസുകാരനാണ് തനിക്ക് ഈ ഫോൺ വിൽപന നടത്തിയത് എന്ന് മൊഴി നൽകിയത്.

സിസിടിവി ദൃശ്യങ്ങൾ കുരുക്കായി

തുടർന്ന് സ്റ്റേഷനിലെ സിസിടിവി ദൃശ്യങ്ങൾ പരിശോധിച്ചതോടെ ബൈജുവാണ് പ്രതിയെന്ന് വ്യക്തമായി തെളിഞ്ഞു. പാറാവ് ഡ്യൂട്ടിയിലുണ്ടായിരുന്ന ബൈജു മേശവലിപ്പിൽ നിന്ന് ഫോൺ എടുക്കുന്നതും അതിലെ സിം കാർഡ് ഊരിമാറ്റുന്നതും ദൃശ്യങ്ങളിൽ വ്യക്തമായി പതിഞ്ഞിരുന്നു. സേനയുടെ അന്തസ്സ് കെടുത്തുന്ന ഇത്തരം പ്രവൃത്തികൾ വച്ചുപൊറുപ്പിക്കില്ലെന്ന നിലപാടിലാണ് ജില്ലാ പോലീസ് മേധാവി. ബൈജുവിനെതിരെ കേസെടുത്തതിന് പിന്നാലെ കൂടുതൽ വകുപ്പുകൾ ചേർക്കാനും വകുപ്പ് തല അന്വേഷണത്തിലൂടെ സസ്പെൻഷൻ ഉൾപ്പെടെയുള്ള കടുത്ത നടപടികളിലേക്ക് കടക്കാനുമാണ് പോലീസിന്റെ തീരുമാനം.

English Summary

In a shocking incident that brought disgrace to the force, Y. Biju, a Senior Civil Police Officer at Chandera Police Station in Kasaragod, has been booked for theft. He allegedly stole and sold a mobile phone that a migrant worker had found and handed over to the station. The theft was discovered when the owner's son came to collect it a week later. Cyber cell tracking and CCTV footage, which showed Biju taking the phone and removing the SIM card, confirmed his involvement. The District Police Chief has ordered strict disciplinary action.