ന്യൂഡല്‍ഹി : ഇന്ത്യയില്‍ നിന്ന് യുഎഇയിലെത്തുന്ന പ്രവാസികള്‍ക്കും സന്തോഷ വാര്‍ത്ത. യുഎഇയില്‍ വെച്ച് ഇന്ത്യക്കാര്‍ക്ക് ഓണ്‍ലൈനായി പണമിടപാടുകള്‍ നടത്തുന്നതിന് യുപിഎ ആപ്പുകള്‍ ഉപയോഗിക്കാം.
ഇന്ത്യന്‍ ബാങ്ക് അക്കൗണ്ടുള്ള ആളുകള്‍ക്ക് ഇനി മുതല്‍ യുഎഇയിലെ കടകളിലും റീട്ടെയില്‍ സ്‌റ്റോറുകളിലും മറ്റ് വ്യാപാരികളിലും യുപിഎ ഉപയോഗിച്ച് പണം അടയ്ക്കാന്‍ സാധിക്കും. അതേസമയം, രാജ്യത്ത് നിയോപേ ടെര്‍മിനല്‍ ഉള്ള സ്ഥലങ്ങളില്‍ മാത്രമേ യുപിഐ ലഭ്യമാകൂ.
ദേശീയ പേയ്‌മെന്റ് കോര്‍പറേഷന്‍ ഓഫ് ഇന്ത്യയുടെ അന്താരാഷ്ട്ര വിഭാഗമായ എന്‍ഐപിഎല്‍ അടുത്തിടെ നിരവധി രാജ്യാന്തര സാമ്പത്തിക സേവന ദാതാക്കളുമായി പങ്കാളിത്തത്തില്‍ ഏര്‍പ്പെട്ടിരുന്നു. അതിന്റെ ഭാഗമായിട്ടാണ് യുഎഇയുടെ മഷ്‌റഖ് ബാങ്കിന്റെ നിയോപേയുമായി കരാറില്‍ ഏര്‍പ്പെടുന്നത്. രാജ്യത്ത് അടിസ്ഥാന സൗകര്യങ്ങള്‍ കൂട്ടുന്നതിന് നിയോപേയും എന്‍ഐപിഎല്‍ 2021 ല്‍ പങ്കാളികളായിരുന്നു.
ഓരോ വര്‍ഷവും ബിസിനസ്, വിനോദസഞ്ചാരം എന്നിങ്ങനെ വിവിധ ആവശ്യങ്ങള്‍ക്കായി യുഎഇ സന്ദര്‍ശിക്കുന്ന 20 ലക്ഷത്തിലേറെ വരുന്ന ഇന്ത്യക്കാര്‍ക്ക് ഇതിലൂടെ പ്രയോജനം ലഭിക്കും. പണമിടപാടുകള്‍ നടത്തുന്നതിനായി ഉപയോക്താക്കള്‍ക്ക് ഇന്ത്യയില്‍ യുപിഐ അധിഷ്ഠിത ബാങ്ക് അക്കൗണ്ട്, ഭിം മൊബൈല്‍ ആപ്പ് എന്നിവ ഉണ്ടായിരിക്കണം. എന്നാല്‍, യുഎഇയില്‍ എല്ലായിടത്തും യുപിഐ സേവനം ലഭ്യമാകില്ല. നിയോപേ ടെര്‍മിനലുകളുള്ള വ്യാപാരികളും സ്ഥാപനങ്ങളും മാത്രമാണ് പണമിടപാടുകള്‍ സ്വീകരിക്കുക.
ഭൂട്ടാനിലും നേപ്പാളിലും യുപിഐ സംവിധാനം ഇതിനോടകം തന്നെ അംഗീകരിച്ചിട്ടുണ്ട്. 2022 അവസാനം സിംഗപ്പൂരിലും ഈ സംവിധാനം ഉപയോഗിച്ച് പണം ഇടപാടുകള്‍ നടത്താനാകുമെന്നാണ് പ്രതീക്ഷിക്കപ്പെടുന്നത്.