തെരുവുകളുറങ്ങുന്നില്ല; രാഹുലിന് പിന്തുണയുമായി യൂത്ത് കോൺഗ്രസ് കൽപറ്റയിൽ നൈറ്റ് മാർച്ച് നടത്തി
കൽപറ്റ-അപകീർത്തി കേസിൽ സൂറത്ത് കീഴ്‌ക്കോടതി ശിക്ഷിച്ചതിനെത്തുടർന്നു എം.പി സ്ഥാനം നഷ്ടമായ രാഹുൽഗാന്ധിക്ക് ഐക്യദാർഢ്യം പ്രഖ്യാപിച്ചും പാർലമെന്റ് സെക്രട്ടേറിയറ്റ് നടപടിയിൽ പ്രതിഷേധിച്ചും യൂത്ത് കോൺഗ്രസ് നടത്തിയ നൈറ്റ് മാർച്ചിൽ വൻ പങ്കാളിത്തം. സംസ്ഥാന പ്രസിഡന്റ് ഷാഫി പറമ്പിൽ എം.എൽ.എ, ജില്ലാ പ്രസിഡന്റ് സംഷാദ് മരക്കാർ എന്നിവർ നയിച്ച മാർച്ചിൽ നൂറുകണക്കിനു യുവജനങ്ങൾ തീപ്പന്തങ്ങളുമായി അണിനിരന്നു. കേന്ദ്ര ഭരണത്തിനെതിരെ ഉശിരൻ മുദ്രാവാക്യങ്ങൾ മാർച്ചിൽ മുഴങ്ങി. ജില്ലാ കോൺഗ്രസ് കമ്മിറ്റി ഓഫീസ് പരിസരത്ത് രാത്രി എട്ടരയോടെ ആരംഭിച്ച മാർച്ചിന് പുതിയ സ്റ്റാൻഡ് പരിസരത്തായിരുന്നു സമാപനം.