(താനൂർ): പൊതുവിദ്യാലയങ്ങളിലെ കുട്ടികളിൽ ശാസ്ത്രീയ മനോഭാവവും ഗവേഷണ അഭിരുചിയും വളർത്തിയെടുക്കുന്നതിനായി സമഗ്ര ശിക്ഷ കേരളയും കൊച്ചി ശാസ്ത്ര സാങ്കേതിക സർവ്വകലാശാലയും (CUSAT) ചേർന്ന് നടപ്പിലാക്കുന്ന 'സ്ട്രീം എക്കോസിസ്റ്റം' (STREAM Ecosystem) പദ്ധതിയുടെ ഭാഗമായി താനൂർ ബി.ആർ.സിയിൽ പ്രോജക്ട് അവതരണം സംഘടിപ്പിച്ചു.
കഴിഞ്ഞ ദിവസം (31/01/26) നടന്ന പരിപാടിയിൽ 8, 9 ക്ലാസുകളിലെ ഗവേഷക കൂട്ടം അംഗങ്ങളാണ് തങ്ങളുടെ പ്രോജക്റ്റുകൾ അവതരിപ്പിച്ചത്. 12 വിദ്യാലയങ്ങളിൽ നിന്നുള്ള തിരഞ്ഞെടുത്ത കുട്ടികളും അധ്യാപകരും പരിപാടിയിൽ പങ്കാളികളായി.
ഉദ്ഘാടനവും മൂല്യനിർണ്ണയവും:
റിയോൺ ആൻറണി ഉദ്ഘാടനം നിർവഹിച്ച ചടങ്ങിൽ ട്രെയിനർ സലിം സ്വാഗതം പറഞ്ഞു. മലയാളം സർവ്വകലാശാലയിലെ സ്കൂൾ ഓഫ് എൻവിയോൺമെൻറ് സ്റ്റഡീസ് അസിസ്റ്റൻറ് പ്രൊഫസർ ഡോ. സബ്ന വി. കുട്ടികളുടെ പ്രോജക്റ്റുകൾ വിശദമായി വിലയിരുത്തി. പ്രോജക്റ്റുകൾ കൂടുതൽ ശാസ്ത്രീയവും മികവുറ്റതുമാക്കാൻ വേണ്ട നിർദ്ദേശങ്ങൾ അവർ കുട്ടികൾക്ക് നൽകി.
എല്ലാ വിദ്യാലയങ്ങളും മികച്ച നിലവാരമാണ് പുലർത്തിയത്. ഇതിൽ നിന്നും ജില്ലാതല അവതരണത്തിനായി 8, 9 ക്ലാസുകളിൽ നിന്ന് ഓരോ പ്രോജക്റ്റുകൾ (രണ്ട് കുട്ടികളും ഒരു മെന്ററും) വീതം തിരഞ്ഞെടുത്തു. ഡി.പി.ഒ സുരേഷ് കൊളശ്ശേരി ആശംസകൾ അറിയിച്ചു. സി.ആർ.സി.സി സുരഭി ചടങ്ങിന് നന്ദി പറഞ്ഞു.
