അറസ്റ്റും ഇഡിയുടെ കസ്റ്റഡിയില് റിമാന്ഡ് ചെയ്തതും നിയമവിരുദ്ധം; കെജ്രിവാള് ഹൈക്കോടതിയില്
ന്യൂഡല്ഹി: ഇ ഡി കസ്റ്റഡിയില് വിട്ടതിനെതിരെ അരവിന്ദ് കെജ്രിവാള് ഡല്ഹി ഹൈക്കോടതിയില്. നാളെ അടിയന്തര വാദം കേള്ക്കണമെന്നാണ് കെജ്രിവാളിന്റെ ആവശ്യം. അറസ്റ്റ് ചെയ്തതും ഇഡി കസ്റ്റഡിയില് വിട്ടതും നിയമവിരുദ്ധമെന്നും കെജ്രിവാള് ഹൈക്കോടതിയില് വ്യക്തമാക്കി. ഡല്ഹി മദ്യനയ അഴിമതിക്കേസില് ഇഡി അറസ്റ്റ് ചെയ്ത കെജ്!രിവാളിനെ കോടതി ഇന്നലെ ആറ് ദിവസത്തേക്ക് റിമാന്ഡ് ചെയ്തിരുന്നു.
കസ്റ്റഡിയിലുള്ള അരവിന്ദ് കെജ്രിവാളിനെ ഇഡി ഇന്ന് വിശദമായി ചോദ്യം ചെയ്യും. ആറുദിവസത്തെ കസ്റ്റഡി കാലാവധിയാണ് നിലവിലുള്ളത്. ഇതേ കേസില് അറസ്റ്റിലായ, തെലങ്കാന മുന് മുഖ്യമന്ത്രി കെ ചന്ദ്രശേഖര് റാവുവിന്റെ മകളായ കെ കവിതയും ഇഡി കസ്റ്റഡിയിലാണ്. കെജ്രിവാളിനെയും കവിതയേയും ഒരുമിച്ചിരുത്തി ചോദ്യം ചെയ്യും എന്നാണ് പുറത്ത് വരുന്ന വിവരം. എന്നാല് കവിതയുടെ കസ്റ്റഡി കാലാവധി ഡല്ഹി റോസ് അവന്യൂ കോടതി മാര്ച്ച് 26 വരെ നീട്ടി.
പ്രത്യേക ജഡ്ജി കാവേരി ബവേജയാണ് ഉത്തരവ് പുറപ്പെടുവിച്ചത്. മാര്ച്ച് 26ന് രാവിലെ 11ന് കവിതയെ ഹാജരാക്കണമെന്ന് അന്വേഷണ ഏജന്സിക്ക് നിര്ദ്ദേശം നല്കി. വെള്ളിയാഴ്ച സുപ്രീംകോടതി കവിതയുടെ ജാമ്യം നിരസിക്കുകയും വിചാരണ കോടതിയെ സമീപിക്കാന് ആവശ്യപ്പെടുകയും ചെയ്തിരുന്നു. നൂറ് കോടി രൂപ കെ കവിത ആം ആദ്മി നേതാക്കള്ക്ക് നല്കിയെന്നാണ് ഇഡിയുടെ കണ്ടെത്തല്.
