അബുദാബിയിൽ ഇലക്ട്രിക് സ്കൂട്ടറുകൾക്കായി പുതിയ നിയമങ്ങൾ പുറത്തിറക്കി. ഇതനുസരിച്ച് 700 വാട്ട് എഞ്ചിനുകളുള്ള ഇലക്ട്രിക് ബൈക്കുകൾ പെർമിറ്റ് ഇല്ലാതെ ഓടിക്കാൻ കഴിയില്ലെന്ന് അബുദാബി ട്രാൻസ്പോർട്ട് റെഗുലേറ്റർ അറിയിച്ചു. സീറ്റുകളുള്ള സ്‌കൂട്ടറുകളെ ‘ലൈറ്റ് വെഹിക്കിൾ’ ആയി തരംതിരിച്ചിട്ടില്ലെന്നും മുനിസിപ്പാലിറ്റി ആന്റ് ട്രാൻസ്പോർട്ട് വകുപ്പിന്റെ ഇന്റഗ്രേറ്റഡ് ട്രാൻസ്പോർട്ട് സെന്റർ സോഷ്യൽ മീഡിയ പ്ലാറ്റ്‌ഫോമുകളിലൂടെ നൽകിയ വിശദീകരണത്തിൽ പറഞ്ഞു.പെർമിറ്റ് ഇല്ലാതെ ലൈറ്റ് വാഹനങ്ങൾ ഉപയോഗിക്കാം. അതിൽ ബൈക്കുകൾ, സീറ്റുകളില്ലാത്ത സ്കൂട്ടറുകൾ, ലോ-പവർ ഇലക്ട്രിക് ബൈക്കുകൾ എന്നിവ ഉൾപ്പെടുന്നു. എന്നിരുന്നാലും സംരക്ഷണകവജങ്ങൾ ധരിക്കണം എന്നത് നിർബന്ധമാണ്.ഇലക്ട്രിക് ബൈക്ക് ഓടിക്കുമ്പോൾ താഴെ പറയുന്ന നിയമങ്ങൾ നിർബന്ധമായും പാലിക്കണം.
ട്രാഫിക് ഫ്ലോയുടെ ദിശയ്‌ക്കെതിരെ സൈക്കിളുകളും സ്‌കൂട്ടറുകളും ഓടിക്കരുത്. പരമാവധി വേഗത പരിധി മണിക്കൂറിൽ 60 കിലോമീറ്ററിൽ കൂടുതലുള്ള റോഡിലൂടെ സൈക്കിളോ സ്കൂട്ടറോ ഓടിക്കുന്നത് ഒഴിവാക്കുക.
നടത്തത്തിനും ഓടുന്നതിനുമായി നിശ്ചയിച്ചിട്ടുള്ള സ്ഥലങ്ങളിൽ സൈക്കിളോ സ്കൂട്ടറോ ഓടിക്കരുത്.
സൈക്കിളോ സ്കൂട്ടറോ ഓടിക്കുമ്പോൾ ഓടുന്ന മറ്റൊരു വാഹനത്തിൽ പിടിക്കരുത്. എല്ലായ്‌പ്പോഴും ഒരു സംരക്ഷിത ഹെൽമെറ്റ് ധരിക്കുക, ഇരുണ്ട പ്രദേശങ്ങളിൽ സവാരി ചെയ്യുമ്പോൾ പ്രതിഫലിക്കുന്ന വസ്ത്രങ്ങൾ ധരിക്കുക.