മലപ്പുറം: ടെലഗ്രാം വഴി കുട്ടികളുടേത് ഉൾപ്പെടെയുള്ള അശ്ലീല വീഡിയോകൾ വിൽപന നടത്തിയ യുവാവിനെ മലപ്പുറം സൈബർ ക്രൈം പോലീസ് പിടികൂടി. നിലമ്പൂർ ചുങ്കത്തറ സ്വദേശി സഫ്വാൻ (20) ആണ് അറസ്റ്റിലായത്.
തട്ടിപ്പ് രീതി:
സോഷ്യൽ മീഡിയ പ്ലാറ്റ്ഫോമായ ടെലിഗ്രാം ഉപയോഗിച്ച് വിവിധ ഗ്രൂപ്പുകളിലും സ്വകാര്യ ചാനലുകളിലും അശ്ലീല വീഡിയോകൾ പ്രചരിപ്പിക്കുകയും, ആവശ്യക്കാർക്ക് പണം വാങ്ങി വിൽപന നടത്തുകയുമായിരുന്നു ഇയാളുടെ രീതി. കുട്ടികളുടെ ദൃശ്യങ്ങൾ ഉൾപ്പെടെ ഇയാൾ കൈമാറ്റം ചെയ്തിരുന്നു.
പോലീസ് നടപടി:
മലപ്പുറം ജില്ലാ പോലീസ് മേധാവി വിശ്വനാഥ് ആർ. ഐ.പി.എസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് നടപടി. ജില്ലാ ക്രൈം റെക്കോർഡ് ബ്യൂറോ ഡി.വൈ.എസ്.പി അഷാദിന്റെ മേൽനോട്ടത്തിൽ സൈബർ ക്രൈം എസ്.എച്ച്.ഒ ചിത്തരഞ്ജൻ, എസ്.ഐമാരായ നജുമുദ്ധീൻ, അബ്ദുൽ ലത്തീഫ് എന്നിവരടങ്ങുന്ന സംഘമാണ് പ്രതിയെ പിടികൂടിയത്. പ്രതിയിൽ നിന്ന് രണ്ട് മൊബൈൽ ഫോണുകൾ പിടിച്ചെടുത്തു.
നിയമനടപടി:
പോക്സോ, ഐ.ടി ആക്ട് ഉൾപ്പെടെയുള്ള ഗുരുതര വകുപ്പുകൾ ചുമത്തിയാണ് കേസ് എടുത്തിരിക്കുന്നത്. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു. ഇയാൾ മുൻപ് കഞ്ചാവ് കേസിലും പിടിയിലായിട്ടുണ്ട്. സൈബർ കുറ്റകൃത്യങ്ങൾ തടയുന്നതിനായി നിരീക്ഷണം ശക്തമാക്കിയതായി പോലീസ് അറിയിച്ചു.
വാർത്ത: കരുമ്പിൽ ലൈവ് ന്യൂസ് ഡെസ്ക്
