തിരൂരങ്ങാടി: സേവന പാതയിൽ വീണ്ടും പൊൻതൂവൽ ചാർത്തി തിരൂരങ്ങാടി പി.എസ്.എം.ഒ കോളേജ് എൻ.എസ്.എസ് യൂണിറ്റ്. വിദ്യാർത്ഥികൾ നിർമ്മിച്ചു നൽകിയ 'സൗഹൃദഭവന'ത്തിന്റെ താക്കോൽദാനം കോളേജ് സെമിനാർ ഹാളിൽ വെച്ച് നടന്ന ചടങ്ങിൽ കാലിക്കറ്റ് സർവകലാശാല വൈസ് ചാൻസലർ ഡോ. പി. രവീന്ദ്രൻ നിർവ്വഹിച്ചു.
കഴിഞ്ഞ മൂന്ന് വർഷങ്ങൾക്കുള്ളിൽ എൻ.എസ്.എസ് യൂണിറ്റ് നിർമ്മിച്ചു നൽകുന്ന ആറാമത്തെ വീടാണിത്. ഓരോ വർഷവും വീടില്ലാതെ ദുരിതമനുഭവിക്കുന്ന സഹപാഠിക്ക് വേണ്ടി വീട് നിർമ്മിച്ചു നൽകുന്ന പദ്ധതിയുടെ ഭാഗമായാണിത്. സേവന രംഗത്ത് എൻ.എസ്.എസ് യൂണിറ്റ് നടത്തുന്ന വേറിട്ട പ്രവർത്തനങ്ങളെ വൈസ് ചാൻസലർ അഭിനന്ദിച്ചു.
കോളേജ് മാനേജർ ജനാബ് എം.കെ. ബാവ സാഹിബും വൈസ് ചാൻസലറും ചേർന്ന് വാർഡ് മെമ്പർ അബ്ദുൽ ഹക്കീമിനാണ് താക്കോൽ കൈമാറിയത്. പ്രിൻസിപ്പൽ ഇൻചാർജ് ലഫ്റ്റനന്റ് ഡോ. കെ. നിസാമുദ്ദീൻ ചടങ്ങിൽ അധ്യക്ഷത വഹിച്ചു.
മറ്റ് കാരുണ്യ പ്രവർത്തനങ്ങൾ:
വീട് നിർമ്മാണത്തിന് പുറമെ 'പി.എസ്.എം.ഒ കെയർ' (പാലിയേറ്റീവ് പ്രവർത്തനം), എം.കെ. ഹാജി വില്ലേജ് ലൈബ്രറി, 'ബ്ലഡ് ലിങ്ക്' (രക്തദാനം), 'ഫ്രൂട്ട്ഫുൾ വില്ലേജ്' (വൃക്ഷത്തൈ നടൽ), 'ബയോ ഫാർമിംഗ്' (ജൈവകൃഷി) തുടങ്ങി ഒട്ടേറെ മാതൃകാപരമായ പ്രവർത്തനങ്ങൾ യൂണിറ്റ് നടത്തിവരുന്നുണ്ട്.
ചടങ്ങിൽ കാലിക്കറ്റ് സർവകലാശാല എൻ.എസ്.എസ് കോഓർഡിനേറ്റർ ഡോ. വിജയകുമാർ മുഖ്യപ്രഭാഷണം നടത്തി. എൻ.എസ്.എസ് പ്രോഗ്രാം ഓഫീസർ ഡോ. അലി അക്ഷദ് സ്വാഗതം പറഞ്ഞു. പ്രോഗ്രാം ഓഫീസർമാരായ നൗഫൽ പി.ടി, അബ്ദുൽ റഊഫ്, കുരുണിയൻ പറമ്പ് വാർഡ് മെമ്പർ അബ്ദുൽ ഹക്കീം, ഓഫീസ് സൂപ്രണ്ട് മുജീബ് റഹ്മാൻ കാരി, മുൻ പ്രോഗ്രാം ഓഫീസർ ഡോ. ഷബീർ വി.പി എന്നിവർ ആശംസകൾ അർപ്പിച്ചു. സൗഹൃദഭവനം കോഓർഡിനേറ്റർ ഷുഹൈബ് നന്ദി രേഖപ്പെടുത്തി.
കൂടുതൽ വാർത്തകൾക്ക് Karumbil Live സന്ദർശിക്കുക.
