ന്യൂഡൽഹി: നിയമസഭാ തെരഞ്ഞെടുപ്പിന് മുന്നോടിയായി നിർണ്ണായക തീരുമാനങ്ങളുമായി കോൺഗ്രസ് ഹൈക്കമാൻഡ്. വരുന്ന നിയമസഭാ തെരഞ്ഞെടുപ്പിൽ ലോക്സഭാ എം.പിമാർ മത്സരിക്കേണ്ടതില്ലെന്ന ധാരണയിലാണ് നേതൃത്വം എത്തിയിരിക്കുന്നത്. ചൊവ്വാഴ്ച കേരളത്തിൽ ചേരുന്ന തെരഞ്ഞെടുപ്പ് സമിതി യോഗത്തിൽ സ്ഥാനാർത്ഥി നിർണ്ണയം അടക്കമുള്ള കാര്യങ്ങളിൽ കൂടുതൽ വ്യക്തത വരും.
പ്രധാന തീരുമാനങ്ങൾ:
- എം.പിമാർക്ക് 'നോ': എം.പിമാർ നിയമസഭയിലേക്ക് മത്സരിക്കുന്നത് ദേശീയ തലത്തിൽ തിരിച്ചടിയാകുമെന്നും ഉപതെരഞ്ഞെടുപ്പുകളുടെ ഭാരം ഒഴിവാക്കണമെന്നുമാണ് കേന്ദ്ര നേതൃത്വത്തിന്റെ നിലപാട്.
- സിറ്റിംഗ് എം.എൽ.എമാർ: ഭൂരിഭാഗം സിറ്റിംഗ് എം.എൽ.എമാരും ഇത്തവണയും മത്സരരംഗത്തുണ്ടാകും.
- മുഖ്യമന്ത്രി സ്ഥാനാർത്ഥി: മുഖ്യമന്ത്രി സ്ഥാനാർത്ഥിയെ മുൻകൂട്ടി പ്രഖ്യാപിക്കില്ല. 'കൂട്ടുത്തരവാദിത്തത്തോടെ' തെരഞ്ഞെടുപ്പിനെ നേരിടാനാണ് തീരുമാനം.
തരൂർ ഇടഞ്ഞു തന്നെ:
അതേസമയം, ഡൽഹിയിൽ നടന്ന ഹൈക്കമാൻഡ് ചർച്ചകളിൽ നിന്ന് ശശി തരൂർ വിട്ടുനിന്നത് പാർട്ടിക്കുള്ളിൽ വലിയ ചർച്ചയായിട്ടുണ്ട്. കൊച്ചിയിലെ 'മഹാപഞ്ചായത്ത്' വേദിയിൽ രാഹുൽ ഗാന്ധി പേര് പരാമർശിക്കാത്തതിലും പ്രസംഗക്രമം മാറ്റിയതിലും തരൂർ അസംതൃപ്തനാണെന്നാണ് വിവരം.
വാർത്ത: കരുമ്പിൽ ലൈവ് ന്യൂസ് ഡെസ്ക്
