പത്തനംതിട്ട: പത്തനംതിട്ടയിൽ ശബരിമല തീർഥാടകർ സഞ്ചരിച്ച ബസും കാറും കൂട്ടിയിടിച്ച് നാല് പേർ മരിച്ചു. കാറിലുണ്ടായിരുന്ന മല്ലശ്ശേരി സ്വദേശികളായ ഒരു കുടുംബത്തിലെ നാല് പേരാണ് മരിച്ചത്. കൂടൽമുറിഞ്ഞകല്ലിൽ പുലർച്ചെ നാല് മണിയോടെയാണ് അപകടമുണ്ടായത്. മത്തായി ഈപ്പൻ, അനു, നിഖിൽ, ബിജു പി ജോർജ് എന്നിവരാണ് മരിച്ചത്. തിരുവനന്തപുരം വിമാനത്താവളത്തിൽ നിന്ന് വരികയായിരുന്നു ഇവർ.

അനുവിന്‍റെയും നിഖിലിന്‍റെയും വിവാഹം നവംബർ അവസാനമാണ് കഴിഞ്ഞത്. മലേഷ്യയിൽ ഹണിമൂണിന് പോയതായിരുന്നു ഇവർ. മത്തായി ഈപ്പനും ബിജു ജോർജും ഇവരെ കൂട്ടാൻ എയർപോർട്ടിലേക്ക് പോയതാണ്. നിഖിലിന്‍റെ അച്ഛനാണ് മത്തായി ഈപ്പന്‍, അനുവിന്‍റെ അച്ഛനാണ് ബിജു പി ജോര്‍ജ്.

മടക്കയാത്ര വീടിന് അടുത്തെത്താറായപ്പോഴാണ് കാർ ബസുമായി കൂട്ടിയിടിച്ചത്. ആന്ധ്രാ സ്വദേശികളായ തീർഥാടകരുടെ ബസുമായാണ് കാർ കൂട്ടിയിടിച്ചത്. അപകടത്തിൽ കാർ പൂർണ്ണമായും തകർന്നു. കാർ വെട്ടിപ്പൊളിച്ചാണ് കാർ യാത്രക്കാരെ പുറത്തെടുത്തത്.