മലപ്പുറം: നാടിനെ ഞെട്ടിച്ച സംഭവത്തിൽ തൊടിയ പുലത്ത് 16-കാരിയായ ഒമ്പതാം ക്ലാസ് വിദ്യാർത്ഥിനിയെ കൊല്ലപ്പെട്ട നിലയിൽ കണ്ടെത്തി. വാണിയമ്പലത്തിനും തൊടിയപുലത്തിനും ഇടയിൽ റെയിൽവേ ട്രാക്കിനോട് ചേർന്നുള്ള പുള്ളിപ്പാടം കുറ്റിക്കാട്ടിലാണ് പെൺകുട്ടിയുടെ മൃതദേഹം കണ്ടെത്തിയത്. സംഭവത്തിൽ പ്രായപൂർത്തിയാകാത്ത ആൺസുഹൃത്തിനെ പോലീസ് കസ്റ്റഡിയിലെടുത്തു.
സംഭവം ഇങ്ങനെ:
ഇന്നലെ സ്കൂളിലേക്ക് പോയ പെൺകുട്ടി വൈകുന്നേരമായിട്ടും വീട്ടിൽ തിരിച്ചെത്തിയിരുന്നില്ല. തുടർന്ന് നടത്തിയ അന്വേഷണത്തിനൊടുവിലാണ് ദാരുണമായ കൊലപാതക വിവരം പുറത്തറിയുന്നത്. കൈകൾ കൂട്ടിക്കെട്ടിയ നിലയിൽ സ്കൂൾ യൂണിഫോമിലായിരുന്നു മൃതദേഹം കിടന്നിരുന്നത്.
പ്രതി പിടിയിൽ:
സംഭവവുമായി ബന്ധപ്പെട്ട് പ്ലസ് വൺ വിദ്യാർത്ഥിയായ 16-കാരനെയാണ് പോലീസ് കസ്റ്റഡിയിലെടുത്തത്. സംശയം തോന്നി പോലീസ് ചോദ്യം ചെയ്തപ്പോൾ ഇയാൾ കുറ്റസമ്മതം നടത്തുകയും മൃതദേഹം കിടക്കുന്ന സ്ഥലം കാണിച്ചു കൊടുക്കുകയുമായിരുന്നു.
കഴുത്ത് ഞരിച്ചാണ് കൊലപാതകം നടത്തിയതെന്ന് പ്രാഥമിക വിവരങ്ങൾ സൂചിപ്പിക്കുന്നു. പെൺകുട്ടിയെ ബലാത്സംഗം ചെയ്തതായും പ്രതി പോലീസിനോട് വെളിപ്പെടുത്തിയിട്ടുണ്ട്. പോലീസ് തുടർനടപടികൾ സ്വീകരിച്ചു വരികയാണ്.
വാർത്ത: കരുമ്പിൽ ലൈവ് ന്യൂസ് ഡെസ്ക്
