ക്ലാരി: എ.എം.എൽ.പി.എസ് ക്ലാരി (ഓട്ടുപാറപ്പുറം) സ്കൂളിൽ രക്ഷിതാക്കൾക്കായി ആരോഗ്യ-സുരക്ഷാ ബോധവൽക്കരണ ക്ലാസും പി.ടി.എ യോഗവും സംഘടിപ്പിച്ചു. കൽപ്പകഞ്ചേരി സി.ഐ യോഗം ഉദ്ഘാടനം ചെയ്തു. സ്ത്രീ സുരക്ഷ, സൈബർ സെക്യൂരിറ്റി തുടങ്ങിയ വിഷയങ്ങളിൽ സി.ഐ ക്ലാസെടുത്തു.
ആരോഗ്യ ബോധവൽക്കരണം:
പെരുമണ്ണ ക്ലാരി പി.എച്ച്.സിയുടെ നേതൃത്വത്തിൽ നടന്ന ആരോഗ്യ ബോധവൽക്കരണ ക്ലാസിൽ രക്ഷിതാക്കളുടെ സംശയങ്ങൾക്ക് മറുപടി നൽകി. ജപ്പാൻ ജ്വരം, മസ്തിഷ്ക ജ്വരം എന്നിവയുടെ വാക്സിനേഷനെക്കുറിച്ചുള്ള രക്ഷിതാക്കളുടെ ആശങ്കകൾക്കും സംശയങ്ങൾക്കും അധികൃതർ വിശദീകരണം നൽകി. ഇതോടനുബന്ധിച്ച് എൽ.എസ്.എസ് വിജയികൾക്കുള്ള സർട്ടിഫിക്കറ്റ് വിതരണവും നടന്നു.
ആധാർ ക്യാമ്പും ഹരിത വിദ്യാലയവും:
കോട്ടയ്ക്കൽ പോസ്റ്റൽ സൂപ്രണ്ടിന്റെ നേതൃത്വത്തിൽ നടന്ന സെഷനിൽ, സ്കൂളിൽ വെച്ച് വിദ്യാർത്ഥികൾക്കായി ആധാർ അപ്ഡേഷൻ ക്യാമ്പ് സംഘടിപ്പിക്കാൻ തീരുമാനമായി. 'ഹരിത വിദ്യാലയം' പദ്ധതി പ്രാവർത്തികമാക്കുന്നതിന്റെ ഭാഗമായി പ്ലാസ്റ്റിക് ഒഴിവാക്കാൻ എല്ലാ രക്ഷിതാക്കളും സ്കൂളിലേക്ക് ഓരോ സ്റ്റീൽ ഗ്ലാസ് വീതം സ്പോൺസർ ചെയ്തത് മാതൃകയായി.
ചടങ്ങിൽ പി.ടി.എ പ്രസിഡന്റ് മാലിക് എം.സി അധ്യക്ഷത വഹിച്ചു. ഹെഡ്മാസ്റ്റർ കെ.വി മുജീബ് സ്വാഗതം പറഞ്ഞു. പി.ടി.എ വൈസ് പ്രസിഡന്റ് മൊയ്തീൻ നിസാമി, എക്സിക്യൂട്ടീവ് അംഗങ്ങളായ അലി വടക്കൻ, റാഫി സി.കെ എന്നിവർ സംസാരിച്ചു. യോഗത്തിനെത്തിയ രക്ഷിതാക്കൾക്ക് പായസ വിതരണവും നടത്തി. സ്റ്റാഫ് സെക്രട്ടറി ശിഹാബ് മാസ്റ്റർ നന്ദി രേഖപ്പെടുത്തി.
വാർത്ത: കരുമ്പിൽ ലൈവ് ന്യൂസ് ഡെസ്ക്
