തിരുവനന്തപുരം: സംസ്ഥാന ഭാഗ്യക്കുറി ക്ഷേമനിധി ബോർഡിൽ കോടികളുടെ അഴിമതി നടന്നതായി സ്പെഷ്യൽ ഓഡിറ്റ് റിപ്പോർട്ട്. പാവപ്പെട്ട ലോട്ടറി ഏജന്റുമാരുടെ ക്ഷേമനിധി തുകയിൽ നിന്ന് 14.93 കോടി രൂപയാണ് ബോർഡിലെ ഒരു ജീവനക്കാരൻ തട്ടിയെടുത്തത്.
തട്ടിപ്പ് ഇങ്ങനെ:
2013 മുതൽ 2020 വരെയുള്ള ഏഴ് വർഷക്കാലയളവിലാണ് ഈ വൻ ക്രമക്കേട് നടന്നത്. ക്ഷേമനിധി ബോർഡിലെ ക്ലർക്ക് ആയിരുന്ന സംഗീത് ആണ് തട്ടിപ്പിന് പിന്നിൽ. ലോട്ടറി വിറ്റ് ഉപജീവനം നടത്തുന്ന ഏജന്റുമാർ മാസാമാസം ബോർഡിലേക്ക് അടയ്ക്കുന്ന വിഹിതം, ബോർഡിന്റെ ഔദ്യോഗിക അക്കൗണ്ടിൽ നിക്ഷേപിക്കുന്നതിന് പകരം സംഗീത് സ്വന്തം അക്കൗണ്ടിലേക്കും ബന്ധുക്കളുടെ അക്കൗണ്ടിലേക്കും മാറ്റുകയായിരുന്നു.
കണ്ണിൽ പൊടിയിടാൻ വ്യാജരേഖ:
വാർഷിക ഓഡിറ്റുകളിൽ പിടിക്കപ്പെടാതിരിക്കാൻ സംഗീത് വ്യാജ രേഖകൾ നിർമ്മിച്ചിരുന്നതായും റിപ്പോർട്ടിൽ പറയുന്നു. തട്ടിപ്പ് സംബന്ധിച്ച് നേരത്തെ ആരോപണങ്ങൾ ഉയർന്നപ്പോൾ തന്നെ ഇയാളെ സർവീസിൽ നിന്ന് സസ്പെൻഡ് ചെയ്തിരുന്നു. എന്നാൽ ഇപ്പോൾ പുറത്തുവന്ന സ്പെഷ്യൽ ഓഡിറ്റ് റിപ്പോർട്ടിലാണ് തട്ടിപ്പിന്റെ വ്യാപ്തി 14 കോടിയിലധികമാണെന്ന് വ്യക്തമായത്.
തൊഴിലാളികളുടെ വിയർപ്പിന്റെ വിലയായ ക്ഷേമനിധി തുകയിൽ കൈയിട്ട സംഭവം ലോട്ടറി മേഖലയിൽ വലിയ പ്രതിഷേധത്തിന് കാരണമായിട്ടുണ്ട്.
വാർത്ത: കരുമ്പിൽ ലൈവ് ന്യൂസ് ഡെസ്ക്
