കേരളത്തിന്റെ സാമൂഹിക പുരോഗതിയുടെയും ചരിത്രത്തിൻ്റെയും ഏടുകൾ തേടിയുള്ള വിജ്ഞാന യാത്രയായ 'ചീഫ് മിനിസ്റ്റേഴ്സ് മെഗാ ക്വിസ്' മത്സരത്തിന് സംസ്ഥാനം സജ്ജമായി. ജനുവരി 12-ന് രാവിലെ 11 മണിക്ക് ആരംഭിക്കുന്ന പ്രാഥമികതല മത്സരങ്ങൾക്കുള്ള എല്ലാ ഒരുക്കങ്ങളും പൂർത്തിയായതായി അധികൃതർ അറിയിച്ചു.
സംസ്ഥാനത്തെ 12,000-ത്തോളം സ്കൂളുകളിലും 1200-ലധികം കോളേജുകളിലുമായി നടക്കുന്ന ഈ ബൃഹത്തായ വിജ്ഞാനോത്സവത്തിൽ അഞ്ച് ലക്ഷത്തിലധികം വിദ്യാർഥികൾ മാറ്റുരയ്ക്കുമെന്നാണ് പ്രതീക്ഷിക്കുന്നത്. ഇൻഫർമേഷൻ പബ്ലിക് റിലേഷൻസ് വകുപ്പ്, പൊതുവിദ്യാഭ്യാസ വകുപ്പ്, ഉന്നത വിദ്യാഭ്യാസ വകുപ്പ് എന്നിവർ സംയുക്തമായാണ് മത്സരം സംഘടിപ്പിക്കുന്നത്.
മത്സര ക്രമീകരണങ്ങൾ ഇങ്ങനെ:
- ലോഗിൻ വിവരങ്ങൾ: രജിസ്ട്രേഷൻ പൂർത്തിയാക്കിയ സ്ഥാപനങ്ങൾക്ക് രജിസ്റ്റർ ചെയ്ത മൊബൈൽ നമ്പറിലേക്ക് എസ്.എം.എസ് ആയി യൂസർനെയിമും പാസ്വേഡും ലഭിക്കും. ഇത് ഉപയോഗിച്ച് www.cmmegaquiz.kerala.gov.in എന്ന വെബ്സൈറ്റിൽ ലോഗിൻ ചെയ്യണം.
- ചോദ്യപേപ്പർ: ജനുവരി 12 രാവിലെ 10.30 മുതൽ നോഡൽ ഓഫീസർമാർക്ക് വെബ്സൈറ്റിൽ നിന്നും ഒ.ടി.പി ഉപയോഗിച്ച് ചോദ്യപേപ്പർ ഡൗൺലോഡ് ചെയ്യാം.
- ഉത്തരസൂചിക: രാവിലെ 11.10-ഓടെ ഉത്തരസൂചികയും ലഭ്യമാകും.
- ഘടന: മത്സരം പൂർണമായും എഴുത്തുപരീക്ഷയായിരിക്കും. പ്രാഥമിക മത്സരത്തിൽ 30 ചോദ്യങ്ങളും, ടൈബ്രേക്കറിനായി 10 ചോദ്യങ്ങളുമാണുള്ളത്.
സമ്മാനങ്ങൾ:
വിദ്യാർത്ഥികളെ കാത്തിരിക്കുന്നത് ആകർഷകമായ സമ്മാനങ്ങളാണ്.
- സ്കൂൾ തലം: ഒന്നാം സമ്മാനം: 5 ലക്ഷം രൂപ, രണ്ടാം സമ്മാനം: 3 ലക്ഷം രൂപ, മൂന്നാം സമ്മാനം: 2 ലക്ഷം രൂപ.
- കോളേജ് തലം: ഒന്നാം സമ്മാനം: 3 ലക്ഷം രൂപ, രണ്ടാം സമ്മാനം: 2 ലക്ഷം രൂപ, മൂന്നാം സമ്മാനം: 1 ലക്ഷം രൂപ.
കൂടാതെ വിജയികൾക്ക് മെമന്റോയും പ്രശസ്തിപത്രവും ലഭിക്കും. ക്വിസിനായുള്ള പഠനസഹായ സാമഗ്രിയായ 'എന്റെ കേരളം' പ്രത്യേക പതിപ്പിന്റെ ഡിജിറ്റൽ കോപ്പി ഔദ്യോഗിക വെബ്സൈറ്റിൽ ലഭ്യമാണ്.
സ്കൂൾ തലത്തിൽ വ്യക്തിഗതമായും തുടർന്ന് ടീമായും, കോളേജ് തലത്തിൽ വ്യക്തിഗതമായും പിന്നീട് ടീമായും മത്സരിക്കാവുന്ന രീതിയിലാണ് ഗ്രാൻഡ് ഫിനാലെ വരെ നീളുന്ന ഈ മത്സരം ക്രമീകരിച്ചിരിക്കുന്നത്.
വാർത്ത: കരുമ്പിൽ ലൈവ് ന്യൂസ് ഡെസ്ക്
