മലപ്പുറം | ജില്ലയിലെ വിവിധയിടങ്ങളില് മൂന്നു ദിവസമായി എക്സൈസ് വകുപ്പ് നടത്തിയ പരിശോധനയില് 68.895 കിലോഗ്രാം കഞ്ചാവും 99 ലിറ്റര് മദ്യവും പിടിച്ചെടുത്തു. സംഭവുമായി ബന്ധപ്പെട്ട് മൂന്ന് പേരെ അറസ്റ്റ് ചെയ്തു. ഈ കേസുകളില് മദ്യവും കഞ്ചാവും കടത്താനുപയോഗിച്ച വാഹനങ്ങളും കസ്റ്റഡിയിലെടുത്തിട്ടുണ്ട്.
കരുവാരകുണ്ട് മില്ലും പടി - കുട്ടത്തില് നിന്നും പോണ്ടിച്ചേരി മദ്യവുമായി പെരിന്തല്മണ്ണ വാഴങ്ങോട് സ്വദേശി ജയപ്രകാശിനെ(39) കാളികാവ് റേഞ്ച് ഇന്സ്പെക്ടര് ടി. ഷിജുമോന്റെ നേതൃത്വത്തിലുള്ള സംഘമാണ് പിടികൂടിയത്. ഇയാളില് നിന്നും 99 ലിറ്റര് മദ്യവും സഞ്ചരിച്ച ഇന്നോവ കാറും പിടിച്ചെടുത്തു. പ്രതിയെ റിമാന്ഡ് ചെയ്തു.
മഞ്ചേരി റേഞ്ച് എക്സൈസ് ഇന്സ്പെക്ടര് ഇ.ടി. ഷിജുവിന്റെ നേതൃത്വത്തില് നടത്തിയ പരിശോധനയില് അരീക്കോട് വെള്ളേരിമുണ്ടൂഴിയില് സ്വദേശി സുരേഷ് കുമാറിനെ (50) സംഘം പിടികൂടി. ഇയാളില് നിന്നും 2.080 കിലോഗ്രാം കഞ്ചാവും പിടിച്ചെടുത്തു. പ്രതിയെ റിമാന്ഡ് ചെയ്തു.
പോരൂര് ചെറുകോടില് കാളികാവ് റേഞ്ച് ഇന്സ്പെക്ടര് ടി. ഷിജുമോന്, എക്സൈസ് ഇന്റലിജന്സ് ഇന്വെസ്റ്റിഗേഷന് ബ്യൂറോ ഇന്സ്പെക്ടര് മുഹമ്മദ് ഷഫീക് എന്നിവരുടെ നേതൃത്വത്തില് നടത്തിയ സംയുക്ത പരിശോധനയില് ഗൂഡലൂര് മണവയല് സ്വദേശി ടി. ജെ ജസ്റ്റിനെ (27) അറസ്റ്റ് ചെയ്തു. ഇയാളില് നിന്നും 66.815 കിലോഗ്രാം കഞ്ചാവ് പിടികൂടി.
കാറില് രഹസ്യ അറകള് ഉണ്ടാക്കി കഞ്ചാവ് ഒളിപ്പിച്ചു കടത്തുന്നതിനിടെയാണ് പ്രതിയെയും ബൊലേറോ വാഹനവും പിടികൂടിയത്. പരിശോധനകളില് കാളികാവ് എക്സൈസ് റേഞ്ച് സംഘവും എക്സൈസ് കമ്മീഷണറുടെ ഉത്തര മേഖല സ്ക്വാഡും പങ്കെടുത്തു.
