റാഗിംഗ്: കോഴിക്കോട് വിദ്യാര്ത്ഥികള് തമ്മില് ഏറ്റുമുട്ടി;നിരവധി പേര്ക്ക് പരിക്ക്
കോഴിക്കോട്|മുക്കം: മുക്കം ഐഎച്ച്ആർഡി കോളജിൽ വിദ്യാർഥികൾ തമ്മിൽ സംഘർഷം. സീനിയർ, ജൂനിയർ വിദ്യാർഥികൾ തമ്മിലാണ് സംഘർഷമുണ്ടായത്. ഏറ്റുമുട്ടലിൽ നിരവധി വിദ്യാർഥികൾക്ക് പരിക്കേറ്റു. രണ്ടാം വർഷ ബികോം വിദ്യാർഥികളായ ഷെനിജിൻ, അമൽ, ദിൽഷാദ്, അനിരുദ്ധൻ, ആകാശ് എന്നിവർക്കാണ് പരിക്കേറ്റത്.
ഇവരെ മുക്കം സിഎച്ച്സിയിൽ പ്രവേശിപ്പിച്ചു.
തിങ്കളാഴ്ച ഉച്ചയ്ക്ക് ഒന്നോടെയായിരുന്നു വിദ്യാർഥികൾ ഏറ്റുമുട്ടിയത്. മൂന്നാം വർഷ വിദ്യാർഥികൾ പുറത്തു നിന്നും ആളെ കൂട്ടി തങ്ങളെ മർദിക്കുകയായിരുന്നു എന്നാണ് മർദനമേറ്റ വിദ്യാർഥികൾ പറയുന്നത്.
കഴിഞ്ഞ വ്യാഴാഴ്ച മൂന്നാം വർഷ വിദ്യാർഥികൾ രണ്ടാം വർഷ വിദ്യാർഥികളെ റാഗ് ചെയ്തുവെന്ന് പരാതി ഉണ്ടായിരുന്നു. ഇതുസംബന്ധിച്ച് ഉടലെടുത്ത പ്രശ്നങ്ങളാണ് അക്രമത്തിൽ കലാശിച്ചത്.
റാഗിംഗുമായി ബന്ധപ്പെട്ട് പരാതി ലഭിച്ചിട്ടുണ്ടെന്നും എന്നാൽ മൂന്നാം വർഷ വിദ്യാർഥികൾക്ക് സ്റ്റഡി ലീവായതിനാൽ ഡിസംബർ മൂന്നിന് ക്ലാസ് തുടങ്ങുന്ന ദിവസം രണ്ടു കൂട്ടരെയും വിളിച്ചു പരാതി കേൾക്കാൻ ഇരിക്കെയാണ് സംഘർഷമുണ്ടായതെന്നും റിപ്പോർട് മേലധികാരികൾക്ക് അയച്ചിട്ടുണ്ടെന്നും പ്രിൻസിപ്പൽ പറഞ്ഞു.
