ഒഡിഷ ട്രെയിന് അപകടം: കാരണം കോറമണ്ഡല് എക്സ്പ്രസിന്റെ പിഴവെന്ന് കണ്ടെത്തല്
ഭുവനേശ്വര്: 280 പേരുടെ മരണത്തിനിടയാക്കിയ കോറമണ്ഡല് ട്രെയിന് അപകടത്തിന്റെ കാരണം കോറമണ്ഡല് എക്സ്പ്രസിന്റെ പിഴവെന്ന് നിഗമനം.
ഷാലിമാര് – ചെന്നൈ കോറമണ്ഡല് എക്സ്പ്രസ് ട്രാക്ക് തെറ്റിച്ചതായാണ് അപകടസ്ഥലത്ത് എത്തിയ റെയില്വേ ഉദ്യോഗസ്ഥരുടെ പ്രാഥമിക നിഗമനം. 130 കിലോ മീറ്റര് വേഗത്തിലെത്തിയ കോറമണ്ഡല് എക്സ്പ്രസ് ചരക്ക് വണ്ടിയിലേക്ക് ഇടിച്ചുകയറുകയായിരുന്നുവെന്നും ഉദ്യോഗസ്ഥര് കണ്ടെത്തി.
മെയിന് ട്രാക്കിലൂടെ പോകേണ്ട കോറമണ്ഡല് എക്സ്പ്രസ് ലൂപ്പ് ട്രാക്കിലൂടെ മാറിയോടുകയായിരുന്നു. നിര്ത്തിയിട്ടിരുന്ന ചരക്ക് ട്രെയിനില് ആദ്യം ഇടിച്ചത് കോറമണ്ഡല് എക്സ്പ്രസാണ്. മാനുഷികമായ പിഴവാകാം ഈ ട്രാക്ക് മാറ്റത്തിന് കാരണമെന്നാണ് പ്രാഥമിക നിഗമനം. 130 കിലോ മീറ്റര് വേഗതയില് കോറമണ്ഡല് എക്സ്പ്രസ് ചരക്ക് തീവണ്ടിയിലേക്ക് ഇടിച്ചുകയറി. ഈ കൂട്ടിയിടിയില് കോറമണ്ഡല് എക്സ്പ്രസിന്റെ 22 ബോഗികളും പാളം തെറ്റി. ഇതില് മൂന്ന് ബോഗികള് തൊട്ടടുത്ത ട്രാക്കിലൂടെ പോവുകയായിരുന്ന യശ്വന്ത്പുര്-ഹൗറ എക്സ്പ്രസിലേക്ക് വീണു. ഇതോടെ, കൃത്യമായ പാതയിലൂടെ പോവുകയായിരുന്ന ഹൗറ എക്സ്പ്രസിന്റെ നാല് ബോഗികളുടെ പാളം തെറ്റി എന്നുമാണ് റെയില്വേ ഉദ്യോഗസ്ഥരുടെ പ്രാഥമിക നിഗമനം.
